4. อโลมวิมานวตฺถุ
[711]
‘‘อภิกฺกนฺเตน วณฺเณน, ยา ตฺวํ ติฏฺฐสิ เทวเต;
โอภาเสนฺตี ทิสา สพฺพา, โอสธี วิย ตารกาฯ
[712]
‘‘เกน เตตาทิโส วณฺโณ…เป.…
วณฺโณ จ เต สพฺพทิสา ปภาสตี’’ติฯ
[714]
สา เทวตา อตฺตมนา…เป.… ยสฺส กมฺมสฺสิทํ ผลํฯ
[715]
‘‘อหญฺจ พาราณสิยํ, พุทฺธสฺสาทิจฺจพนฺธุโน;
อทาสิํ สุกฺขกุมฺมาสํ, ปสนฺนา เสหิ ปาณิภิฯ
[716]
‘‘สุกฺขาย อโลณิกาย จ, ปสฺส ผลํ กุมฺมาสปิณฺฑิยา;
อโลมํ สุขิตํ ทิสฺวา, โก ปุญฺญํ น กริสฺสติฯ
[717]
‘‘เตน เมตาทิโส วณฺโณ…เป.… วณฺโณ จ เม สพฺพทิสา ปภาสตี’’ติฯ
อโลมวิมานํ จตุตฺถํฯ
5. กญฺชิกทายิกาวิมานวตฺถุ
[719]
‘‘อภิกฺกนฺเตน วณฺเณน…เป.… โอสธี วิย ตารกาฯ
[720]
‘‘เกน เตตาทิโส วณฺโณ…เป.…วณฺโณ จ เม สพฺพทิสา ปภาสตี’’ติฯ
[722]
สา เทวตา อตฺตมนา…เป.… ยสฺส กมฺมสฺสิทํ ผลํฯ
[723]
‘‘อหํ อนฺธกวินฺทมฺหิ, พุทฺธสฺสาทิจฺจพนฺธุโน;
อทาสิํ โกลสมฺปากํ, กญฺชิกํ เตลธูปิตํฯ
[724]
‘‘ปิปฺผลฺยา ลสุเณน จ, มิสฺสํ ลามญฺชเกน จ;
อทาสิํ อุชุภูตสฺมิํ [อุชุภูเตสุ (ก.)], วิปฺปสนฺเนน เจตสาฯ
[725]
‘‘ยา มเหสิตฺตํ กาเรยฺย, จกฺกวตฺติสฺส ราชิโน;
นารี สพฺพงฺคกลฺยาณี, ภตฺตุ จาโนมทสฺสิกา;
เอกสฺส กญฺชิกทานสฺส, กลํ นาคฺฆติ โสฬสิํฯ
[726]
‘‘สตํ นิกฺขา สตํ อสฺสา, สตํ อสฺสตรีรถา;
สตํ กญฺญาสหสฺสานิ, อามุตฺตมณิกุณฺฑลา;
เอกสฺส กญฺชิกทานสฺส, กลํ นาคฺฆนฺติ โสฬสิํฯ
[727]
‘‘สตํ เหมวตา นาคา, อีสาทนฺตา อุรูฬฺหวา;
สุวณฺณกจฺฉา มาตงฺคา, เหมกปฺปนวาสสา;
เอกสฺส กญฺชิกทานสฺส, กลํ นาคฺฆนฺติ โสฬสิํฯ
[728]
‘‘จตุนฺนมปิ ทีปานํ, อิสฺสรํ โยธ การเย;
เอกสฺส กญฺชิกทานสฺส, กลํ นาคฺฆติ โสฬสิ’’นฺติฯ
กญฺชิกทายิกาวิมานํ ปญฺจมํฯ
6. วิหารวิมานวตฺถุ
[729]
‘‘อภิกฺกนฺเตน วณฺเณน…เป.… โอสธี วิย ตารกาฯ
[730]
‘‘ตสฺสา เต นจฺจมานาย, องฺคมงฺเคหิ สพฺพโส;
ทิพฺพา สทฺทา นิจฺฉรนฺติ, สวนียา มโนรมาฯ
[731]
‘‘ตสฺสา เต นจฺจมานาย, องฺคมงฺเคหิ สพฺพโส;
ทิพฺพา คนฺธา ปวายนฺติ, สุจิคนฺธา มโนรมาฯ
[732]
‘‘วิวตฺตมานา กาเยน, ยา เวณีสุ ปิฬนฺธนา;
เตสํ สุยฺยติ นิคฺโฆโส, ตุริเย ปญฺจงฺคิเก ยถาฯ
[733]
‘‘วฏํสกา วาตธุตา, วาเตน สมฺปกมฺปิตา;
เตสํ สุยฺยติ นิคฺโฆโส, ตุริเย ปญฺจงฺคิเก ยถาฯ
[734]
‘‘ยาปิ เต สิรสฺมิํ มาลา, สุจิคนฺธา มโนรมา;
วาติ คนฺโธ ทิสา สพฺพา, รุกฺโข มญฺชูสโก ยถาฯ
[735]
‘‘ฆายเส ตํ สุจิคนฺธํ, รูปํ ปสฺสสิ อมานุสํ;
เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติฯ
[736]